HTML5 නම් නව HTML වෙළුම ආරම්භයත් සමගම වගේ YouTube විශේෂයෙන් HTML5 video පහසුකම යොදා වීඩියෝවක් පෙන්වන වෙනමම වෙබ් සේවයක් ආරම්භ කළා. බොහෝ දෙනා සිතුවේ අනාගතයේදී YouTube දැනට භාවිතා කරන Flash Plugin එක අත හැර නව HTML5 හි ඇති video ටැග් පහසු කම භාවිතා කරනු ඇත කියා යි. නමුත් YouTube සඳහන් කර සිටින්නේ මේ ආකාරයට YouTube සේවාව සම්පූර්ණයෙන්ම HTML5 වලට මාරු කළ නොහැකි බවයි. ඒ සඳහා HTML5 තුළ පහසුකම් ස්ථාපනය වී නැති බවයි.

තවදුරටත් YouTube හී තාක්ෂණික බ්ලොග් අඩවියේ සඳහන් කොට ඇත්තේ HTML5 video පහසුකම Flash සඳහා ආදේශකයක් නොවන බවයි. එසේ කරන්නට නම් YouTube සේවාවේ ඇති පහසුකම් බොහෝමයක් කැප කිරීමට සිදුවෙනවා. උදාහරණයක් විදියට Flash තුළ වීඩියෝව පරිශීලකයාට අවශය ලෙස වීඩියෝවේ තත්වය පහත් කිරීමේ (dynamic video quality control) පහසු කම, කැමති තැනක සිට වීඩියෝව නැරඹිමේ පහසුකම, සම්පූර්ණ තිරය දක්වා වීඩියෝව විශාල කිරීමේ හැකියාව ආදී පහසුකම් රැසක් HTML5 හී video ටැක් එක භාවිතා කර කරන වීඩියෝ දර්ශනයකදී කළ නොහැකියි.

HTML5 වල video tag එක සමග වීඩියෝ දර්ශනයක් ඇතුළත් කිරීම සමාන්‍ය වෙබ් අඩවියකට පහසුවක් වුවද YouTube වැනි සේවාවකට එය තවමත් හරිහැටි සමපාත නොවේ. කෙසේ වුවත් YouTube විසින් HTML5 ඔස්සේද වීඩියෝ බැලීමේපහසුකම දිගටම ලබාදීමට තීරණය කර ඇත. Flash සඳහා තවමත් සහය නොදක්වන iPhone හිමියන්ට මෙය යහපත් ආරංචියක් වෙනු ඇත.

නව වෙළුමේ වඩා සුවිශේෂිතම අංගය වනුයේ බ්ලොග් අඩවි කිහිපයක් එකම WordPress ස්ථාපනයක් මගින් සිදු කළහැකි වීමයි. එසේම plugins භාවිතයකින් තොරවම ‍Menu ඇතුලත් කිරීමට හැකියි.

වැඩි විස්තර සඳහා http://wordpress.org/development/2010/06/thelonious/ බලන්න.

මේ වන විට Digg, twitter, reddit ආදී ටෙරාබයිට්‌ සිය ගණන්‌ වලින්‌ දත්‌ත හුවමාරු වන වෙබ්‌ අඩවි වල දත්‌ත හසුරුවන්‌නට යොදාගන්‌නේ cassandra database system එකයි. මෙය NoSQL භාවිතයෙන්‌ Google විසින්‌ භාවිතා කරන BigTable වල ඇති ColumnFamily database මොඩයලය ආදර්‌ශයට ගෙන Dynamo දත්‌ත ගබඩා කිරීමේ ක්‍රමවේදයට අනුව නිපදවූවක්‌.

මෙම database system එක server කීපයක දත්‌ත අනු ලෙස (multimple node) පිටපත්‌ කරගනී. මේ නිසා එක්‌ නෝඩ‌යක්‌ යාවත්‌කාලීන කිරීම නැවතුනහොත්‌,‌ තව එකකින්‌ නැවත පිහිටවනු ලබයි. ඒ අනුව දත්‌ත ඉල්‌ලන විට අඩුවෙන්‌ම භාවිතාවෙන සර්‌වරයෙන්‌ දත්‌ත සැපයිය හැක. එසේම පද්‌ධතියේ දරා ගැනීමේ හැකියාව වැඩි කිරීමට අවශ්‍යනම්‌ සිදුකළ යුත්‌තේ තවත්‌ server පද්‌ධතියට සම්‌බන්‌ධ කිරීම පමණයි. ­facebook වැනි විශාල දත්‌ත ගබඩා ඇති වෙබ්‌ අඩවි සඳහා මෙවැනි දත්‌ත පද්‌ධතියකින්‌ ලැබෙන සේවය ඉතා ඉහලයි.

මෑතක්‌ වෙනතුරුම Digg වෙබ්‌ අඩවිය භාවිතා කළේ MySQL දත්‌ත පද්‌ධතියක්‌ වුවත්‌ පසුගිය මාසයේ ඔවුන්‌ Cassandra වලට මාරු වුනා. Digg අඩවිය ප්‍රකාශ කර සිටින්‌නේ තම පද්‌ධතියට MySQL දරාගත නොහැකි බවයි. තවද Digg අඩවියේ සමහර අංග MySQL තුළ ක්‍රියාත්‌මක වීම සඳහා තත්‌පර 14ක්‌ පමණ ගතවුවත්‌ Cassendra එය තත්‌පරයක්‌ ඇතුළත‌ කරදීමට සමත්‌ බව පැවසෙනව.

2012 සංසිද්ධිය වෙත බොහෝ දෙනා සිතන්නට යෙදුනේ 2012 Doomsday චිත්‍රපටිය තිරගත වීමත් සමගයි. 2012 සංසිද්ධිය මායන් වරුන්ගේ දිනදර්ශනය හා ඍජු සම්බන්ධතාවක් දක්වයි. දින 144000ක දීර්ඝ අවුරුදු චක්‍රයක් (බක්ටූන්) අවසන් වන්නේ 2012 දෙසැම්බර් 20 වන දිනයි. එම නව යුගය ඇරඹුම දෙසැම්බර් 21 දින සිදුවේ.(තවත් මතයකට අනුව මෙය දෙසැම්බර් 23 වන දින වේ.) නමුත් මෙදින ලෝක විනාශය සිදුවිය හැකිද? මායන් වරු එක් වර්ෂ චක්‍රයක් ආරම්භය ඉතා උත්සව ශ්‍රීයෙන් සමරන බව කියවේ. එවන් දිනයක ලෝක විනාශය සිදු විය හැකිද?

මායන් වරු කැලැන්ඩර් කීපයක් භාවිතා කර ඇත.ඉන් ප්‍රධානම කැලැන්ඩරයට අනුව වර්ෂ චක්‍රයකට වර්ෂ 394 කට ආසන්න කාලයකි. ඒ අනුව පසු ගිය බක්ටූනය (b’ak’tun) ගෙවීගියේ වසර 1618 සැප්තැම්බර් 18වන දිනයි. ප්‍රවාදයන්ට අනුව කියවෙන්නේ මායන් දීර්ඝ දින දර්ශනය ආරම්භ වී ඇත්තේ ලෝකය ආරම්භ දිනයේදීය. එනම් ක්‍රිස්තු පූර්ව 3114 ඔක්තෝම්බර් 11 වන දිනයි. එය ඇරඹෙන්නේ බක්ටූන 13, 12 , 11 ආදීලෙස අඩුවෙමින්. එය 0 දක්වා ගමන්කොට නැවතත් එකිනෙක වැඩිවීමට පටන්ගනී. ඒ අනුව මේ අප ගත කරන්නේ ලෝක ආරම්භයේ සිට 25 වන බක්ටූනයයි. නො එසේනම් 12 වන බක්ටූනයයි. 2012 එලඹීමට නියමත වන්නේ 13න් වන බක්ටූනයයි. නමුත් මේ පිළිබඳවද විවිධ මත භේද පවති. නමුත් මේ ලිපියේ වපසරියෙන් ඔබ්බට යන බැවින් ඒ පිළිබඳව මෙහිදී දීර්ඝ ලෙස සාකච්ඡා කිරීමට බලාපොරොත්තු නොවේ.

ඊලඟට අපි මේ කැලන්ඩරය පසෙක තබා යොමුවන්නේ නොස්ත්‍රදාමුස්(Nostradamus) වෙතටයි. නොස්ත්‍රදාමුස් බොහෝ දෙනා දන්නා පරිදි අවුරුදු 500කට පමණ පෙර අද ගැන සාර්ථක අනාවැකි පළකලේ යැයි ප්‍රසිද්ධ අයෙකි. ඔහුගේ අනාවැකි නිවැරදි බව බොහෝ දෙනා පිලිගන්නා අතර සමහරුන් පවසන්නේ ඔහුගේ ගැටලු සහගත වැකි අනාගතයට හරියන ලෙස අපි විසින් සකස් කරගන්නා බවයි. කෙසේ නමුත් නොස්ත්‍රදාමුස් ගේ අනාවැකි එක එල්ලේ බොරුවක් ලෙස අපට ඉවත දැමිය නොහැක. නොස්ත්‍රදාමුස් විසින් ප්‍රකාශයට පත් කරන්නට යෙදුනු The Centuries නම් ග්‍රන්ථය මහත් ප්‍රසිද්ධියක් උසුලයි. මොහු විසින් අනාවැකි කීම සඳහා සහජ හැකියාව, ජ්‍යෝතිෂය, සින්දුරම් ශාස්ත්‍රය(Alchemy)ආදිය භාවිතා කර ඇත. අනාවැකි ඉදිරිපත් කිරීමේදී කරුණු කියවූ විට එකවරම නොවැටහෙන පරිදි ඉදිරපත් කිරීම ඔහුගේ තවත් විශේෂත්වයකි. The Centuries නමින් පලකරන ලද ග්‍රන්ථයේද සියලු අනාවැකි මෙසේ සඟවා ප්‍රකාශ කර ඇත. නමුත් ඒ අදාල සිද්ධිය සිදුවු පසු මේ කියන්නට යෙදුනේ මෙම අනාවැකිය බැව් පැහැදිලව පෙනෙන ලෙස ඒවා ලියා ඇත. කෙසේනමුත් බොහෝ දෙනා විසින් බලාපොරොත්තු වුන පරිද තුන්වන ලෝක යුද්ධයක් සිදු නොවීම නොස්ත්‍රදාමුස්ගේ අනාවැකි ගැන ලොකු විශ්වාසයක් තැබිය නොහැකි තත්වයකට ගෙන එන්නක් වී ඇත.

The young lion will overcome the older one,
On the field of combat in a single battle;
He will pierce his eyes through a golden cage,
Two wounds made one, then he dies a cruel death.

යුධ බිමේ දී එක් සටනකදී
තරුණ සිංහයා විසින් මහළු සිංහයා පරදවයි,
ඔහු විසින් ඔහුගේ ඇස් රන්කූඩුව හරහා යයි
තුවාල දෙකක් එකක් වේ, පසුව ඔහු දුක්ඛිත මරණයකට පත්වේ.

(Century 1, Quatrain 35)

මේ අනාවැකිය ප්‍රංශයේ දෙවන හෙන්රි රජුගේ මරණය ගැනයි. හෙන්රි රජු Jousting නමින් හැඳින්වෙන අශ්වයන් පිට නැගි හෙල්ලක් අතින් ගෙන කරන කරන ද්වන්ද සටනකදී දරුණු ලෙස තුවාල ලබා මිය ගියේය. මෙම සටනේදී ප්‍රතිවාදියා වූ Gabriel, comte de Montgomery සහ හෙන්රි රජු යන දෙදෙනාම සිංහයා කොටා ඇති ලෝහ ඇඳුමක් හැඳ සිටියේය. ප්‍රතිවාදියා ඔහුට වඩා අවුරුදු 6ක් බාලය. The young lion will overcome the older one, On the field of combat in a single battle; යන වැකියෙන් එය පසක්වෙයි. මෙහිදී තුවාල දෙකක් සිදුවුන අතර. එකක් දරුණුව රජු මියගියේය. (Two wounds made one, then he dies a cruel death.) නොස්ත්‍රදාමුස් කී දෙයෙක් ලෙහෙසියෙන් අත හැරිය නොහැකි බව මෙයින් පසක් වේි.ඔහු John F. Kennedy ඝාතනය, 911 සිද්ධිය, නැපෝලියන් බොනපාට්, හිට්ලර් යන අය ගැන ප්‍රසිද්ධ අනාවැකි පලකළ අයෙකි. 2012 සඳහා නොස්ත්‍රදාමුස් කිසියම් අනාවැකියක් පල කළ ඇතිද යන්න අපට ඉතා වැදගත් වන්නේ ඒ නිසාය. බොහෝ විට නොස්ත්‍රදාමුස් වර්ෂය පවසන්නේ ව්‍යංගයෙනි. නොඑසේ නම් ඒ ආසන්න සිද්ධියක් හා ගලපා ගනිමින් අපට වර්ෂය සොයාගැනීමට සිදුවේ. එසේ නමුදු පසු කාලිනව සොයාගත් මුද්‍රණයෙන් පිට නොවූ නොස්ත්‍රාමුස් විසින් නිර්මිත යැයි සැක කරන චිත්‍ර සටහන් කීපයකට අනුව ලෝක විනාශයක් ගැන කියවෙන බවට මත පලවේ. මෙම ලිපිය සමග ඒ පිංතූරද ඇතුලත් වේ.

අපට පෙනෙන අහස පෘථිවියට, සෞරග්‍රහ මණ්ඩලයට සාපේක්‍ෂව වර්ෂ 72කදී අංශක එකකින් වාමාර්තව භ්‍රමණයවේ. මෙය පෘථිවියේ ඇලය නිසා සිදුවන්නකි. මේ හේතුව නිසා වසර 26000කට පමණ වරක් සූර්යා අප සිටින චක්‍රාවාටයේ (කිරිසයුර – Milky Way) මධ්‍ය ලක්‍ෂයට පැමිනේ. මායන් දින දර්ශනයට අනුව 2012 දෙසැම්බර් 21 වෙනි දින වන විට නැවතත් පෘථුවිය සූර්යා සහ කිරිසයුරේ මධ්‍ය ලක්‍ෂ එකිනෙක එකම රේඛාවක පිහිටන බවට මතයක් ඇත. නමුත් මෙය සම්පූර්ණයෙන්ම නිවැරදි මතයක් නොවේ. මන්ද සූර්යා කිරිසයුරේ මධ්‍ය ලක්‍ෂය පහු කරන එක දිනයක් නොමැති විමයි. කෙසේ වෙතත් මේ කාලයේදී සූර්යා කිරිසයුරේ මධ්‍ය ලක්‍ෂය පසු කරමින් සිටි. මේ සඳහා අවුරු 30ක් පමණ ගත වේ. ඒ අනුව 2012 දෙසැම්බරය කිසිදු විශේෂත්යක් නොදක්වයි. කෙසේ වුවත් බක්ටූනය අවසන්විමත් ගැලැක්ටික් අලයින්මන්ට් නමින් හැඳින්වෙන මෙම සංසිද්ධියත් යන දෙකම එකවර සිදුවන බැවින් එයින් ලෝක විනාශයක් කියවෙන බව සමහර අය මත පල කරයි. මේ සඳහා සාක්‍ෂි ලෙස දක්වන්නේ නොස්ත්‍රදාමුස් විසින් ඇඳ ඇති බවට විශ්වාස කරන මේ චිත්‍රයි.

1 රූපය තුළ ඇති සූර්යා දෙස බලන්න – සූර්යාගේ කිරණ 7ක් ඇත එසේම ඉහල රිබන් පටියත් සමග අති චක්‍රය තුළ රේඛා 7ක් ඇත. අනෙක් සෑම චිත්‍රයකම රිබන් පටියක් සහ චක්‍රයක් ඇත. එසේම ඒ හැම චක්‍රයකම රේඛා 8 බැගින් ඇත. මේ චිත්‍ර අතර ඇති සම්බන්ධතා විවිධ අදහස් සහ මතභේද ඇත. කෙසේ නමුත් මේ සෑම චිත්‍රයකම ඇති චක්‍රය විසින් සූර්යා නිරූපණය වන බව පලමු චිත්‍රය මගින් පැහැදිලි වේ. රතු තොප්පියක් පැලඳ සිටින සිංහයා සිංහ රාශිය නිරූපණය කරන අතර හිරු කිරණ මගින් සත්වන චක්‍රය නිරුපණය කරයි. (ජ්‍යෝතිෂයට අනුව විවිධ රාශීන් සඳහා වර්ෂ යුගයන්ට බෙදීමක් කරයි) ඒ අනුව සිංහ යුගයේ ආම්භවන 8වන චක්‍රය මෙමගින් නිරුපණය කරන බව සිතිය හැක. 7වන රූපයේදී චක්‍රය තුළ සූර්යා නොමැත. අනික් චිත්‍රවල පැවති පොත මේ චිත්‍රෙය් හිස්ව ඇත. සූර්යා නැවත උදා නොවන බවත් ජීවිතය පිළිබඳපොත(book of life) හිස්ව ඇති බවත් එක් මතයකට අනුව කියවේ.

මෙහි රූප එකිනෙක සම්බන්ධ කරමින් විවිධ මත පලකොට ඇත. ඒ සෑම එකකින්ම බොහෝ දෙනා උත්සාහ කරන්නේමේ චිත්‍ර මගින් 2012 සංසිද්ධිය පිළිබඳ කියවෙන බවයි.

Web bot නම් අනාවැකි කිවහැකි පරිගණක වැඩසටහනකි. මෙය මූලිකව අන්තර්ජාලයේ සෙවීම් කිරීම මගින් කොටස් වෙළඳ පොල සහ ආර්ථික වැටීම් නැගීම් පිළිබඳ අනාවැකි සිදු කිරීම සඳහා නිර්මාණය කළ මෘදුකාංගයකි. නමුත් මෙම මෘදුකාංගය භාවිතයෙන් අනෙකුත් අනාවැකිද කිව හැකි බව එහි නිර්මාතෘවරුන් පවසයි. මොවුන් විසින් පළකරන ලද අනාවැකිවල නිවැරදිතාවය 50%ක් පමණ වේ. web bot නිර්මාතෘ විසින් 2012 දී පෘතුවියේ උත්තර හා දක්‍ෂිණ ධ්‍රැව වල චුම්භකතාවය මාරු විය හැකි බව පවසා ඇත. නොඑසේනම් න්‍යෂ්ටික පිපිරිම් කීපයක් සිදුවිය හැකි බව පවසයි.

2012 සංසද්ධිය ඉතා සංකීර්ණ වූ මති මතාන්තර මතින් ගොඩ නැගි ඇත. කෙසේ වුවත් මේවා බොහෝදුරට ඒ ඒ මත ඉදිරිපත් අයට පිලිගැනීමට අවශ්‍ය කරුනු අවශ්‍ය ලෙස දැකීමට ඇති ඕනෑකම නිසා සාදාගත් ඒවා වීමට බොහෝ දුරට ඉඩ ඇත. අනෙක් අතට මායන් කැලැන්ඩරයට අනුව 2012දී ලෝක විනාශයක් පිළිබඳ ඍජු අදහක් නොකියවේ. නොස්ත්‍රදාමුස්ගේ යැයි සැක කරන චිත්‍ර ගැනද විවිධ මත ඇත. web bot මෘදුකාංගය වෙබ් අඩවි මගින් ලබාගන්නා තොරතුරු මත ප්‍රතිඵලයකට එලඹෙන බැවින් ඒ පිළිබඳ වැඩි විශ්වාසයක් තැබිය නොහැක.

ලීවේ. දසුන් සමීර වීරසිංහ

ඉංග්‍රීසි මෘදුකාංග වලට සිංහල අතුරු මුහුණත්‌ (interface) සැකසීම දේශීයකරණයට ප්‍රමාණවත්‌ නොවේ. අපගේ දැක්‌ම අනුව දේශීයකරණය දෙයාකාරයකින්‌ සිදුවිය යුතු යි. පළමුව දේශීය ඵලදායිතාව නැංවීම සඳහා අවශ්‍ය තොරතුරු තාක්‍ෂණය දැනුම ඉහල දැමිය යුතුය. ගොවිපලේ සිට කර්‌මාන්‌ත සහ කාර්‌යාලීය මට්‌ටම දක්‌වා තොරතුරු තාක්‍ෂණය භාවිතා කිරීමට ඇති හැකියාව වැඩි දියුණු කිරීම මේ යටතට වැටේ. භාෂාව මේ සඳහා විශාල බාධකයක්‌ විය හැකි බැවින්‌ දේශීයකරණයට සිදු කිරීමේදී ඒ ඒ අංශයන්‌ගෙන්‌ රටට සිදුව ඍජු සහ වක්‍ර බලපෑම්‌ අනුව ඒවාට ප්‍රමුඛතාවය ලබා දී ක්‍රියාත්‌මක කළ යුතුය.

දෙවන කොටසට අයිති වනුයේ තොරතුරු තාක්‍ෂණය භාවිතා කිරීම සඳහා තාක්‍ෂණවේදීන්‌ සැකසීමේ කාර්‌යයයි. මේ සඳහා ක්‍රමවත්‌ අධ්‍යාපන ක්‍රමයක්‌ සැකසීම සහ ඒ සඳහා අවශ්‍ය පහසුකම්‌ ශිෂ්‍ය ශිෂ්‍යාවන්‌ට සහ දැනට එම ක්‍ෂේත්‍රෙය්‌ නියැලෙන අයට ලබාදීම අනිවාර්‌ය වේ.

අ.පො.ස. සාමාන්‍ය පෙළ සහ උසස්‌ පෙළ සඳහා අතිරේක විෂයක්‌ ලෙස තොරතුරු තාක්‍ෂණය(ICT සහ GIT) හඳුන්‌වා දීම මෙහි ලා අගය කළ යුතු ක්‍රියාමාර්‌ගයකි. එසේම නව විෂය නිර්‌දේශය යටතේ උසස්‌ පෙළ ප්‍රධාන විෂයක්‌ ලෙස තොරතුරු තාක්‍ෂණය (IT) ඉගැන්‌වීමට ආරම්‌භ කිරීම වඩාත්‌ අගය කළ යුතුය. ඉතා වටිනා අගය කළයුතු විෂය නිර්‌දේශයකින්‌ එය සමන්‌විතය.

අපගේ දැක්‌මට අනුව දැනට අරටුව ශක්‌තිමත්‌ව සැකසෙමින්‌ පවතී. අනෙකුත්‌ බාහිර කරුණු ද, එයට අවශ්‍ය කරන ශක්‌තිය ද ලබාදේ නම්‌ ත්‍රස්‌තවාදයෙන්‌ මිදුනු අපේ රටට අහිමිව ගිය ආර්‌ථික ස්‌ථානයද නැවත හිමිකරදීමට අනාගත පරපුරට හැකි වනු නොඅනුමානය.

මෙම කලාපයේ

නමුත් තවත් කෙනෙකුට ඒ ගත වූ කාලය ගැන නිරපේක්ෂව කියන්න අපිට පුළුවන් ද? අවුරුද්දක් කියන එක අපට තේරෙනවා, දැනෙනවා. නමුත් අවුරුද්ද කියන දෙය මෙන්න මෙහෙමයි කියල කාටවත් කියන්න පුළුවන් ද? (භෞතිකව නිරූපණය කරන්න පුළුවන්ද?) අවුරුදු ගතවෙනව අපිට තේරෙනවා. අපිට දැනීමක් තියෙනව අවුරුදු ගණන වැඩුණා කියලා.ඒත්, අපිට ඒ ගත වූ කාලය ගැන කෙනෙකුට හරියට පැහැදිලි කරන්න බෑ. ඒ කොහොම වුනත් අපිට කියන්න පුළුවන් යම් කාලයකදි ගසක් මෙච්චරක් උස ගියා, කඳ මෙච්චර මහත් වුනා කියලා.ඔව්, ඇත්ත තමයි. නමුත් මම මෙහෙම කිව්වොත්…? එකම දවසේ එකම මවු ගසකින් ගන්න සෑම අතින්ම එක සමාන බීජ 2ක් එකම දවසෙදි පැළ කරනවා. මේ පැළ වලට එකම විදිහට අවුරුදු පහක් සාත්තු කරනවා. ඒත්, එක් පැළයක (A පැළය) උස 5m හා කඳේ පළල 30cm ද, අනිත් පැළයේ (B පැළය) උස 9m කඳේ පළල 50cm ලෙස වෙනස් ප්‍රමාණ වලින් ගස් වැඩී තිබෙන බව ඔබට දකින්න ලැබෙනවා.එතනදී ඔබට සාපේක්ෂව දකින්න ලැබෙන්නේ A ගසේ උස හා B ගසේ උසයි.නමුත් එම සාපේක්ෂවීමත් ගොඩනැගී තියෙන්නෙ කාලයට සාපේක්ෂව බව මඳක් සිතාබැලුවොත් ඔබට වැටහේවි.

අපි දැන් භාවිතකළ මේ උදාහරණයේදී අපි කතා කළේ කාලය පිළිබඳවයි.නමුත් එහිදීත් අපිට දකින්න ලැබුණේ A පැළය හා B පැළය යන භෞතික නිදර්ශක දෙකයි.මේ අනුව අපි මුලින්ම තේරුම්ගන්න ඕනි භෞතික නිදර්ශක මෙන් අපට නොපෙනුනත්, කාලය කියන්නෙත් අපි අපේ පහසුව සඳහා යොදාගන්නා වෙනත් දේවල් මෙන්ම සාපේක්ෂ දෙයක් බවයි.

හිතන්න අපිට හෙට ඉඳන් රෑ වෙන්නෙ නෑ, හැමදාම ඉර එක වගේ පායලා තියෙනවා. දැන් ඉතින් ඔහොම දින, මාස, අවුරුදු, . . . ටිකෙන් ටික ගත වෙනවා. අපිට කාලය ගත වෙනවා කොහොම දැනේවිද කියලා හිතන්න. හරි දැන් හිතන්න දැන් පවතින විදිහයි, රෑ නොවෙන විටයි, දැනෙන කාලය පිළිබඳ වෙනස. අපිට එකම කාලය අවස්ථා දෙකකදි වෙනස්ව දැනෙනවා නොවෙද? එනම්, මේ අප පවසන කාලය යම් කිසියම් හෝ දෙයකට සාපේක්ෂ නොවේද?

මේ ගැන කථා කරන කොට අපට විද්‍යාවේ නොයෙකුත් දාර්ශනිකයන් මතක් වෙනවා. ඔව්. ඉන් ප්‍රධාන තැනක් නිව්ටන්ට, අයින්ස්ටයින්ට හිමිවෙනවා. නිවුටන්ගේ මතය ඇත්තෙන්ම චලිත නියම මෙන්ම ගුරුත්වාකර්ෂණ වාදය මත පදනම් වූවක්. එය අයින්ස්ටයින්ගේ කොන්ටම්වාදය(quantum law) හා සාපේක්ෂතා වාදය ඉදිරියේ ප්‍රතික්ෂේප වෙනවා. නිව්ටන් කාලය හා අවකාශය හඳුනා ගනු ලබන්නේ නිරපේක්ෂ ලෙසටයි. එනම්, ස්වායත්ත හිස් අවකාශයක ස්වාධීන කාලයක් පැවතිය හැකි බව පිළිගැනීමයි. ඔහුට අනුව කාලය සත්‍යවාදයකි; සත්‍යය එය එහිම ස්වභාවය හේතු කොට ගෙන මිස වෙනත් කිසිවක් හා සම්බන්ධව නොපවතී. ඒ නිසා එහි පැවැත්මට වෙනත් කිසිවක ලක්ෂණයක් හෝ සම්බන්ධයක් උවමනා නැත. වෙනත් කිසිම බාහිරත්වයක් හා සම්බන්ධ නොවන සැමවිටකම ඒකාකාරව හෝ නිශ්චලව පවතී. එනම්, නිවුටන්ට අනුව කාලය නිරපේක්ෂ දෙයකි.

නිව්ටන්ගේ මේ අදහස බිඳ වැටීමට අයින්ස්ටයින්ගේ සාපේක්ෂතා වාදය ප්‍රධාන ලෙස මුල් වෙනවා. අයින්ස්ටයින්ගේ සාපේක්ෂතා වාදය අනුව සෑම දෙයක්ම සාපේක්ෂව සිදුවන්නකි. එනම්, නිරපේක්ෂ නොවේ. කිසිම දෙයකට ස්වයං පැවැත්මක් නැත. ස්වතන්ත්‍ර වූ කිසිවක් නැත. ඒ ලෙස අප භාවිතා කරන වම- දකුණ, ලොකු – කුඩා, යන්න ද සාපේක්ෂ වේ. උදාහරණයක් වශයෙන් නියත ප්‍රවේගයෙන් චලනය වන වස්තුවක් යැයි අප සඳහන් කරන්නේ එය පොළවට සාපේක්ෂව ය. එය වෙන ග්‍රහ ලොවක සිට නිරීක්ෂණය කළහොත් අපට පෙනෙන්නේ ඒ ග්‍රහලොවට සාපේක්ෂ ලෙස වස්තුවේ වේගයයි. එම වස්තුව ජලයේ ගමන් කළ විට එහි දී පොළවේ සිට බැලු විට හා එම වස්තුවේ සිටින විට වේග වෙනස් වේ. එනම්, මේ සාපේක්ෂ භාවයෙන් මිදීමට නොහැකි අවස්ථා ය.

අයින්ස්ටයින්ට අනුව කාලය සාපේක්ෂය. එසේ වුවද, ආලෝකයේ වේගය නොවෙනස්ව පවතිනු ඇත.ි මෙය තරමක් සංකීර්ණ න්‍යායායක් වන අතර එය අපි ඉදිරි කලාපයක පැහැදිලි කරගනිමු.

අප මහා දාර්ශනිකයා වන බුදුරජාණන්වහන්සේගේ දර්ශනය ද අප විමසා බැලිය යුතු ය. බුදු දහම නම් දර්ශනයේ කාලය ගැන සඳහන් වෙනවා. හුදෙක්ම අතීතය, වර්තමානය, අනාගතය ලෙස කාලය ගැන භාවිතා වුවද කාලය සීමිත ද? අසීමිත ද? ඇත්ත ද ? අනන්ත ද? යන්නට කෙලින්ම පිළිතුරක් දී නැහැ. එහෙනම් කාලය අවකාශය පිළිබඳ බුදුදහම දෙන පිළිතුර මොකක්ද? එනම්, පටිච්ච සමුප්පාදයයි. එනම් යම් හේතුවක් නිසා යම් දෙයක් සිදුවෙයි උදාහරණ වශයෙන් හිරු පායන නිසා ශාක වැඩෙයි. ශාක වැඩෙන නිසා ඵල හට ගනී. ආදී වශයෙන් සෑම ක්‍රියාවකටම හේතුවක් ඇත. එය බුදුදහමේ හේතුඵල දහම ලෙස හැඳින් වේ. එනම් බුදුදහම අනුවද කාලය සාපේක්ෂ ය.

දැන් ඔබ හිතයි කාලය ගැන එක එල්ලේ පිළිතුරක් දියනොහැකි නම් මෙය මැවීමක් ද කියලා. ඔව් ඇත්තටම එය මැවීමක් නොව නිර්මාණයකි. එය සර්වබලධාරී දෙවියෙකු හෝ වෙන භූත ආත්මයක් හෝ නිර්මාණය කළ දෙයක් නොවේ. එය මිනිසා විසින්ම තමන්ගේ පහසුවට නිර්මාණය කරගත් දෙයක්. අපිට කාලය අල්ලන්න බෑ. දකින්න බෑ. දැන් ඔබ කියයි, දැනෙන්න පුළුවන් කියලා. නෑ ඒක කාලයට සාපේක්ෂව අනිකුත් දේවල් වෙනස්වීමයි. අපි අඳුර ගන්නා කාලයේ ඇත්ත ඒකයි. නමුත් අපට කාලය කියන දේ දැනෙනවා. හරියට සුළඟ වගෙයි නේද?

ඔබ හිතන්න බලන්න අඟහරු හෝ මොන යම් ග්‍රහ ලොවක අප වැනි ජීවයක් පවතිනවා කියා. එම ග්‍රහ ලොවේ එක දවසක් පැය 24න් අවසන් නොවෙනවා නම්, අපි ගමු පැහැදිලි උදාහරණයක්. බ්‍රහස්පති වල මනුෂ්‍ය ජනාවාසයක් තියෙනවා නම් එහිදී දවසක් පෘථීවියේ වේලාවෙන් පැය 9ක් වෙනවා. අපි එහි ඉන්නා විට අපගේ වයස්ගත වීම සිදුවන්නේ බ්‍රහස්පතිට සාපේක්ෂව ය. එයට අනුව අපගේ ඔරලෝසුව පැය 9කට සාදා ගත යුතු ය. එවිට එහි වෙසෙන මිනිසෙකු හා පෘථීවියේ වෙසෙන මිනිසෙකු එක වෙලාවේ ඉපදුන ද ඔවුන්ගේ වයස සිටින තැන අනුව සාපේක්ෂව වයස වෙනස්වේ යැයි සිතිය හැක.

අපට දැනෙන කාලය ඔරලෝසුවට සාපේක්ෂව හඳුනා ගැනීමක් නොවේද ? ඔබට දෙගුණයකින් තරුණවීමට අවශ්‍ය නම්, ඔබ අද සිට දිනකට පැය 24 වෙනුවට දිනකට පැය 48ක දිනයක් ගෙවන්න. එවිට එම ඔරලෝසුවට සාපේක්ෂව අන් අයට වඩා ඔබ දෙගුණයකින් තරුණ වෙයි. ඇත්තටම කාලය යනු අපට කතා කර නිම කළ නොහැකි දෙයකි.

බෞද්ධ සාහිත්‍ය තුල එන මෙවැනි උදාහරණ ඇත්තෙන්ම කථාවක් ම නොවේ. එහි විද්‍යාත්මක හා තර්කානුකූල බවක් ද ගැබ්වී ඇත. උදාහරණයක් වශයෙන් ධම්ම පදට්ඨ කථාවෙහි එන පතිපූජිකා කථා වස්තුව ගෙන හැර බලමු. එහි දී පූජිත කුමාරි නම් දෙවඟනක් සිටි අතර එක් අවස්ථාවක දි ඈ දිව්‍ය විමානයෙන් මඳකට පිටතට පැමිණියාය. ඒ අවස්ථාවේ දී ඈ දිව්‍ය ලෝකයෙන් චුතව මිනිස් ලොවේ ඉපදිනි. ඈ හැදී වැඩී ළමාවිය පසුකර විවාහ වී, දූදරුවන් පෝෂණය කර දරු මුණුපුරු මිණිපිරියන්ගේ සෙනෙහස ද ලැබ අවුරුදු 80වේදී මිය ගියා. ඈ කළ පිං මහිමය හේතු කොටගෙන ඈ යළිත් ජීවත් වූ දිව්‍ය ලෝකයෙහිම උපත ලැබුවා ය. එවිට එහි වූ දෙවිවරු දෙවඟනන් ඇයගෙන් විමසුවේ පැය තුනක් තිස්සේ කොහි ගොස් සිටියා ද? යන්නයි. සාපේක්ෂ කාලය අනුව ඈට වයස බල පා ඇති අයුරු මෙයින් දැක්වේ.

එසේම මේ මතයට පසුකාලීනව ඇල්බට් අයින්ස්ටයින් ඉදිරිපත් කළ ප්‍රවාදයක් තිබේ. එනම් නිවුන් සොහොයුරන් දෙදෙනා හා අවකාශයන් දෙක පිළිබඳ ප්‍රවාදය යි. ඔවුනොවුන් අතර සමාන ලක්ෂණ ඇති නිවුන් සොහොයුරන් දෙදෙනාගෙන් එක් අයෙකු අභ්‍යවකාශ ගමනක ආලෝකයේ වේගයෙන් යෙදුනේ යැයි සිතමු. සමාන්තර අවකාශයේ ඇති සමාන්තර ලොවකට ඔහුට ගොස් පැමිණීමට අවුරුදු 10ක් ගතවුනේ යැයි සිතමු. ගගනගාමී සොහොයුරා ආපසු පැමිණෙන විට ඔහුගේ වයස අවුරුදු 50ක් වේ. මෙලොව සිටි අනිත් නිවුන් සොහොයුරා මියගොස් එවිට සිටියේ ඔහුගේ මුණුපුරන් හා මිණිපිරියන් බව මෙම ප්‍රවාදයේදී ඔහු සඳහන් කරයි. මීට හේතුව, වූයේ ලොවෙහි කාලයෙන් අවුරුදු 150ක් ගෙවී ඇති නිසා ය. කාල අවකාශ රාමුවේ ඇති වූ වෙනස නිසා මෙසේ සිදුවන බව අයින්ස්ටයින්ගේ ප්‍රවාදයෙන් ඉදිරිපත් කර ඇත. කාලය හා අවකාශය සාපේක්ෂව වන බව බෞද්ධ ධර්මයේ ප්‍රකාශ වූයේ ඈත අතීතයේදීය. දැන් එම අදහස ගැන අයින්ස්ටයින් වැන්නවුන් මෙසේ අදහස් පල කරන්නේ බුදුදහම විද්‍යාවට සැසඳිය නොහැකි බව පෙන්වමින් නොවේද?

ලීවේ: සංජය පෙරේරා

මං මේ දවස්වල නාට්‍ය හා රංග කලාව පිළිබඳ විශේෂවේදී උපාධිය කරනවා.. දැන් යන්නෙ තුන්වෙනි අවුරුද්ද.. දැනට ඉතින් තියෙන ප්‍රධාන වැඩේ ඒක තමයි. මේ දවස්වල නම් විභාග හින්දා ටිකක් හිරවෙලා ඉන්නෙ. ඒකට කරන නාට්‍යයේ පුහුණුවීම් හින්දා…

• නදීක ගුරුගේ අධ්‍යක්‍ෂණය කරපු “රත්නවල්ලී” නාට්‍යයේ අමිලත් චරිතයක් කළා නේද?

ඔව්, ඒකෙ පුලින්ද කියන ගෙවලයගෙ චරිතය රඟපෑවේ මම..

• කොහොමද ඒකට සෙට් වුණේ?
ඒකට interviews තියෙන බව ආරංචි වෙලා මං ගිහින් බැලුවා.. එතෙන්දි පරීක්‍ෂණ කිහිපයකට පෙනීහිටින්න වුනා. මගෙන් ප්‍රශ්න කිහිපයක් ඇහුවා. මං බලල තියෙන නාට්‍ය, චිත්‍රපටි මොනවද, ඒවට කැමති, අකමැති වෙන්න හේතු වගේ දේවල් වලට මට උත්තර දෙන්න සිදුවුනා. ඒ පරීක්‍ෂණ වලින් තේරුණාට පස්සෙ තමයි නාට්‍යයට සම්බන්‍ධ වෙන්න ලැබුණෙ. නාට්‍යයේ පුහුණුවීම් වලට කලින් අපිට මාස හය හතක විශේෂ හඬ පුහුණු වක් තිබ්බා.. මොකෝ අපිට මේ තියෙන සාමාන්‍ය උගුරු කටහඬ මේ නාට්‍යයට සෙට් වෙන්නෑ . ඒ නාට්‍යය හදල තියෙන විදිය අනුව, music කරල තියෙන විදිය අනුව විශේෂයෙන්ම හුස්ම පාලනය කිරීම පිළිබඳව හැදෑරීමක් කරල audience එකට දැනෙන්න voice එක මෙහෙයවන්න ඕනිවුනා. ඒවයින් පස්සෙ තමයි මේ නාට්‍යයට සම්බන්ධ වුනේ.

• “රත්නවල්ලී” නාට්‍යය අමිල දකින්නෙ කොහොමද? ඒ නාට්‍ය‍යේ කරපු චරිතය ගැන ටිකක් කිව්වොත්?

රත්නවල්ලී නාට්‍යයේදී මූලිකවම කතාකරන්නෙ ඉතිහාසයේ අපිට‍ වෙච්ච වැරදීම් ගැන. ඉතිහාසෙ අපේ මිනිස්සු ගත්ත තීරණ ගැන මේ නාට්‍යයේදී ප්‍රශ්න කරනවා.අපේ මිනිස්සු සමහර තැන් වලදි ගත්ත තීරණ වල ආත්මාර්ථකාමී බව(ජාතියක් වශයෙන්) මේ නාට්‍යය රචනාකරපු සුනිල් විජේසිරිවර්ධන මෙතෙන්දි ප්‍රබල ලෙස මතුකරනවා. ඒ තීරණ නිසා අපේ සමාජය වෙනස් වුනු ආකාරය තමයි මේ නාට්‍යයේදී මූලිකව කතාකෙරෙන්නෙ . ඒ වගේම වර්තමානයට බලපෑම් එල්ල කරපු ඉතිහාසයේ ඇතැම් සන්ධිස්ථාන, පාලන තන්ත්‍රය විසින් සිය රාජ්‍යයේ ස්ථාවරත්වය පවත්වාගැනීමට ආගම සමඟ තිබූ සම්බන්‍ධය යොදාගත් ආකාරය වගේ දේවල් ඇතුළු ඉහත කාරණා සියල්ලම වගේ තරමක් ආන්දෝලනාත්මක ආකාරයට මෙහිදී කතාබහට ලක්කෙරෙනවා.

මේ නාට්‍යයේදී මම කරපු චරිතය, “පුලින්ද” කියන ගෙවලයා, දුටුගැමුණු රජතුමාගෙ චරපුරුෂ බලඇණියේ නායකයා වෙලා ඉඳලා මියගියාට පස්සෙ රජතුමාගෙ මන්ත්‍රණ කුටියෙ ගෙවල ආත්මයක් හැටියට රැඳි ඉන්නවා. මේ නාට්‍යයේ කාල තලයන් කිහිපයක් තියෙනවා. එළාර, දුටුගැමුණු හිටපු කාලෙ, වර්තමානය, ඔය අතරමැද විශේෂ සිදුවීම් වෙච්ච කාල වකවානු කිහිපයක් එහෙම. අර කාරණා කතා කරද්දි ඔය කාල තලයන් හරහා තමයි කතා කරන්න තියෙන්නෙ. පුරාවිද්‍යාඥයො කට්ටියක්, බෝසත් චරිතයක් වගේ මේ කාල වල ජීවත් වෙන පිරිසක් ඉන්නවා. මේ “පුලින්ද” කියන ගෙවලයා තමයි එක විදිහකට මේ කාල තලයන් ටික සම්බන්ධ කරන පාලම හැටියට වැඩ කරන්නෙ. මූ චරපුරුෂයෙක් නිසා තොරතුරු දෙන එක තමයි වැඩේ. ඔය අතරෙ ඉන්න බෝසත් කෙනා ඇතුළු කට්ටිය ගෙවලයා හරහා තමයි මේ සිදුවීම් වැල ගැටගහලා පෙන්නන්නෙ. ඒ අතරෙ බෝසත් කෙනා ගෙවලයා ඒ ගෙවල ආත්මෙන් මුදවගන්න දරන උත්සාහයක් එහෙමත් යනවා. අර කලින් කියපු කාරණා ඔය හරහා එකින් එක මතුකරලා පෙන්නනවා.

• සංගීතය පැත්තට යොමු උන විදිහ ගැන කතා කරොත්. දැන් අහන්න දකින්න තියෙන ශෛලීන්ගෙන් තරමක් වෙනස් විදිහක ගීතයකින් නේ මුලින්ම කරළියට ආවේ. ඒ විදිහෙ වැඩක් එක පාරටම කරන්න හිතුනෙ මොකද?

එහෙම කියලා අමුතුවෙන් යොමු විල්ලක් කියලා නෑ බං .. මම අමුතුවෙන් සංගීතය හදාරලාත් නෑ. ඔය රත්නවල්ලී එකට කරපු හඬ පුහුණුව ඇරෙන්න මුකුත් එහෙම කියලා කරලා නෑ. ඒ උනාට ආසාව තිබුනා. ඒත් එහෙම කියලා class ගිහින් පුරුදු වෙන්න උනේ නෑ. මම හැබැයි ගිටාර් එකක් අරගෙන එහෙන් මෙහෙන් ඕක ගගහ හිටියා. නදීක අයියගෙනුත් උදව් එහෙම හම්බවුනා. මම ඉතින් කට්ටිය play කරන දිහා බලන් ඉඳලා, ටික ටික අහගෙන තමයි පුරුදු වුනේ.කාලයක් යද්දි ඉතින් එක එක විදිහට ඕක ඇඟට ආවා. ලියන්න එහෙම සෙට් උනා. ඉතින් මම melody දාගෙන බලනවා ඔය ලියපුවට. දැන් මගේ මේ “ජෝන් සීනා” සින්දුවත් එහෙම ලියවිච්ච එකක් තමයි. ඕක මම ලියලා දැන් අවුරුදු 2ක් විතර වෙනවා. අපෙ ජෙහාන් එක්ක නාට්‍යයක් කරා ඔය කාලෙ. ඒ දවස්වල නිකන් ඉන්න වෙලාවට මම ඕක ගහනවා.ටික ටික ඒකට melody එකක් සෙට් වීගෙන ආවා. ඉතින් වැඩ ඉවර උන වෙලාවට, පොඩි විවේකයක් හම්බ උනාම කට්ටිය ඉතින් කියනවා “මචං, අරක ටිකක් ගහපන්” කියලා. ඔහොම තමයි මුලින් ඕක හැදුනෙ. පස්සෙ තමයි ඔය අපෙ ජෙහාන් කිවුවෙ ඕකට අපි visual එකක් කරමු කියලා.ඕකට හරියන්නෙ මේ විදිහෙ රූප රචනයක් කියලා මුලින් ම අදහස දුන්නෙත් ජෙහාන් ම තමයි.

මගෙ ඔළුවෙත් ඕකට ආසන්න අදහසක් තිබුනා. වැඩිය වැඩ කෑලි නැතුව මේක කරන එක සාර්ථකයි කියලා. මේ සිංදුවෙ හැටි අනුව අපිට මේකට
visual එකක් කරන්න මහ ගොඩක් සල්ලි නොතිබුණු එකත් එක විදිහකට වාසියක් උනා. මේකට පසුබිම් වෙලා තියෙන්නෙ ලංකාවනේ.කොහොමත් සල්ලි තිබුණත් මේ සිංදුවට හරියන්නෙ, ඕක. “උඹ ඔය ඉදිරිපත් කරන විදිහ තමයි ඕකට ගැලපෙන්නෙ” කියන අදහස තමයි හැමෝගෙම තිබුනෙ. සමහරු හිටියා එහෙන් මෙහෙන් ඕකට කෙල්ලෙක් දම්මලා, ඔය අතට පයට මාල වලලු ටිකක් දාගෙන, චේ ඉන්න
T-shirt එකක් ගහගෙන . . අර ඒ විදිහෙ visual එකක් කරමු කියලා.ඒත් ඉතින් බං මේ කොන්ඩෙයි රැවුලයි තිබුණා කියලා මේක මහ දෙයක් ද? එහෙම අමුත්තක් වෙනම උලුප්පලා පෙන්නන්න ඕන කමක් තිබුණෙ නෑ. එහෙම මහ රැඩිකල් කියලා අමුතුවෙන් දෙයක් මේක අස්සට ඔබ්බන්න ඕන නෑනෙ. මේ සින්දුව ලිව්වෙ මම. ඉතින් බං මම ඒක විශ්වාසෙන් කියනවා නම් අනිවාර්යයෙන්ම ඒක
audience එකට යනවනෙ.මොකෝ වැඩේ ගැන මට විශ්වාසයි නේ. මම තෘප්තිමත් නෙ ඒකෙන්.ඒ නිසා තමයි ඔය විදිහෙ visual එකක් එක්ක මේක එලියට ආවෙ. නැතුව මේක මෙහෙ‍ම අමුතු විදිහට කරන්න ඕන කියන අදහසින් හැදුව එකක් නෙවෙයි.

• මේ සංගීත ක්‍ෂෙත්‍රයේ ඉදිරි ගමනක් යන්න මොකක් හරි character එකක් දැන් ඉඳන්ම හදාගෙන යනවද? තමන්ටම කියලා අනන්‍යතාවක් ගොඩනඟාගැනීමේ අදහසක් එහෙම තියෙකවද? දැන් මේ සිංදුව හරහා යම්කිසි ප්‍රතිරූපයක් රසිකයන් අතරෙ ගොඩනැගෙන්න ඇතිනෙ. ඒක දිගටම පවත්වගෙන යන්නද අදහස.?

අනේ මන්දා. මට නම් එහෙම දෙයක් නෑ. දැන් මේ සිංදුවට මේ විදිහ හොඳයි කියලා හිතිච්ච නිසා කරා මිසක් අමුතුවෙන් එහෙම චරිතයක් ගොඩනඟාගන්න මට නම් අවශ්‍යතාවයක් නැහැ. ඊලඟට ආයි සිංදුවක් කරද්දි හොඳයි කියලා වෙන විදිහක් හිතුනොත් ඒක ඒ විදිහට කරනවා. කලිනුත් අර මම කිවුවා වගේ වැඩේ ගැන මම තාප්තිමත් නම්, ඒක විශ්වාසයි නම් එච්චරනෙ ඕන. දැන් ඔය සිංදුව උනත් හැමෝම ගන්නෙ එකම විදිහට නෙවෙයිනෙ. ප්‍රේක්ෂකයා උනත් මේක ගන්නෙ තමන්ගෙ රස වින්දනය අනුවනෙ. ඒ නිසා එක විදිහකට ඒක මට අදාළත් නැහැ. මගේ රසික පිරිස බේරගන්න නම් මම මේ විදිහෙ නිර්මාණ දිගටම කරන්න ඕන කියලා හැඟීමක් නම් නැහැ.

• ඒ කියන්නෙ සමාජයට සාපේක්‍ෂව නෙවෙයිද නිර්මාණ කරන්නෙ..?

ඇත්තටම නෑ. එහෙම අවශ්‍යතාවක් පේන්නෙත් නෑ. මට හිතෙන විදිහට ඒ වෙලාවෙ හැටියටයි කරන්නෙ.

•සංගීතය, කලාව ගැන එහෙම තියෙන්නෙ මොන වගේ අදහසක්ද?

ඒක නිකන් ප්‍රශ්න පත්තරයක් වගේ මට හිතෙන හැටියට. ඔය මුකුත් කවුරුවත් නිර්මාණය කරන්න ඕන කියලා හදපු දේවල් නෙවෙයිනෙ. ලෝකෙ හුඟක් දේවල් වගේ අහම්බයන්ගෙන් පටන් අරන් ඒවගෙන් එලියට ආව ඵල වලින් නෙ මියුසික් එහෙමත් හැදිලා තියෙන්නෙ.. ඒවා කාලයත් එක්ක දියුණු වෙලා නෙ මේ විදිහට හැදිලා තියෙන්නෙ; මේවයි මූලික දේවල්, නියමිත ක්‍රමවේදයන් කියලා ලියවිලා එහෙම ඇත්තෙ. මම ඔය කාරණා ගැන දැනුවත් නෑ ඇත්තටම කිවුවොත්. මම සංගීතය හදාරලා නෑනෙ. ඒත් මට මොන විදිහකට හරි ගිටාර් එක ගහන්න පුළුවන්. මේ මේ තැන් වලට මේ සද්දෙ හොඳයි කියලා අදහසක් දැනෙනවනෙ. ගිටාර් එක විතරක් නෙවෙයි වෙන instrument එකක් උනත්. ඒකට අනුවයි මම සංගීතය දකින්නෙ. හි‍තේ තියෙන හැඟීම් ප්‍රකාශ කරන්න පුළුවන් මාධ්‍යයක් විදිහට. සමහර වෙලාවට ඒක drum එකක් වෙන්නත් පුළුවන්.මොකක් හරි.අවස්ථාවෙ හැටියට එන දේවල් පිටකරන්න හොඳ විදිහ වැඩේ අනුව තීරණය වෙනවා.

• Music වල තියෙන රීතීන්ට එහෙම ගරු කරනවද.? නැත්නම් ඒවා බිඳගෙන යන්නද උත්සාහ කරන්නෙ?

මෙ‍තෙන්ට ඇත්තටම ඔය රීතීන් කියලා දෙයක් අදාළ වෙන්නෙම නෑ මම නම් කියන්නෙ. ඕවා උනත් මිනිස්සු රීතියක් හදන්න ඕන කියලා හදපුවා නෙවෙයිනෙ. කවුරුහරි කෙනෙක් ඒ අවස්ථාවෙ උගේ වැඩේට අවශ්‍ය ක්‍රමයක් හොයාගත්තම, ඒක කලින් ඉදිරිපත් වෙලා නැත්නම්, ඒක නෙ පස්සෙ රීතියක් කියලා ඉදිරිපත් වෙන්නෙ. මම ඇත්තටම ඕවා ගැන අවධානයක් යොමු කරලා නෑ. මගේ හිතේ තියෙන එකනෙ මම එලියට දාන්නෙ.ඉතින් ඔය කියන රීතීන් බිඳින්නවත් ඒවට ගරු කරන්නවත් කියලා විශේෂයක් කරන්නෙ නෑ.

•සංගීතය හුඟක් ‍දැන් වාණිජ පැත්තට නැඹුරුවක් දක්වනවා නේ. ඒ ගැන තියෙන අදහස මොකක්ද? ඒක වරදක් හැටියටද දකින්නෙ. එහෙමත් නැත්නම් ඒක අනුමත කරනවද? සල්ලි ගැන එහෙම තියෙන අදහස?

වරදක් හෝ අනුමත කිරීමක් කියන්න දන්නෙ නෑ. ඔය තියෙන අරමුණු ඉතින් කාලෙත් එක්ක වෙනස් වෙනවනෙ ඇත්තටම කිවුවොත්. අද මොකක් හරි සිංදුවක් කරන එකා තව අවුරුදු 2 කිනුත් සිංදුවක් කරන්නෙ ඒ අරමුණෙන් ම වෙන්න තියෙන ඉඩකඩ හුඟක් ම අඩුයි.. තමන් කරන වැඩේට වටිනාකමක් දෙනවා නම් නිවැරදිව, ඒක නිර්මාණකරුවා දිරිමත් කිරිල්ලක්. ඒත් ඉතින් මේක මේ ගාණට විකුණගන්න ඕන කියලා කරොත් මට හිතෙන විදිහට එතන නිර්මාණයක් බිහි වෙන්න ඉඩක් නැහැ.ජීවත් වෙන්න සල්ලි ඕන වෙලා තියෙනවා. ඒත් මම ඒක ගැන එච්චරටම වැඩිය හිතන්න යන‍්නෙ නෑ. ඉස්සරහට ඒක එන විදිහකට බලනවා මිසක්. දැනට ජොබ් එකක් කරන්නෙත් නෑ. ඒ ඒ අවස්ථාවෙ මම ඉන්න පසුබිම අනුව ඒක තීරණය වෙයි. සල්ලි කොච්චර කොහොම හොයන්න ඕනද කියලා. දැනට මම කැමතියි මේ ජීවිතේට. ලොකුවට ප්ලෑන් ගහ‍ගෙන වැඩ කිරිල්ලක් නැහැ.. මම නම් කියන්නෙ ඒක මහ ‍බොරුවක් නෙ බං., මේ මේ කාලෙ වෙනකොට මම මෙන්න මේ දේ කරනවා කියලා කරන්නෙ.

• එතකොට කලාව ඇතුලෙ රැඳිලා ඉන්නෙ ඇයි? මොකක්ද මේ ජීවිතෙන් බලාපොරොත්තු වෙන්නෙ? ආත්ම තෘප්තියද? හුඟ දෙනෙක් වෘත්තියක් හැටියට රැඳිලා ඉන්නෙ නැහැනෙ මේක ඇතුලෙ.

ඒක මට හරි පහසුවක්. ඇත්තටම එතන මට තෘප්තියක් කියලා දෙයක් තියෙනවා එක්තරා විදිහකට. දැනට. දැන් කොහොම කිවුවත් හැබැයි පස්සෙ කාලෙක ඕක වෙනස් වෙන්නත් පුළුවන්. දැනට මගෙ වටේ ඉන්න පිරිස නිසා හැදිලා තියෙන පසුබිමත් එක්කනෙ මම ක්‍රියාකරන්නෙ. ඉස්සරහට වෙන විදිහක තත්වයක් මතු වෙලා වෙනස් විදිහට වැඩ කරන්න උනොතේ මම ඒ වෙලාවට ඒකට නිදහසට කාරණයක් හදාගනීවි. ඕන කෙනෙක් එහෙමනෙ. බොරු කියවිලි අයින් කරලා ගත්තොත්, ඕන වැඩක් කරන මිනිහෙක් කරකියාගන්න දෙයක් නැති උනොත් කලින් නොකරන්න හිටපු දේවල් කරයි.ඒක ඒ පුද්ගලයාගෙ කෝණෙන් බැළුවම සාධාරණයි. ඒත් කවුරු හරි වැඩක් කරද්දි ඒකෙ තියෙන creative ගතිය, quality එක එහෙම පුද්ගලයගෙ පුහුණුව, හැකියාව, රස වින්දනය අනුව තීරණය වෙනවා.ඒක වෙනස් වෙනවා අඩුයි තරමක් දුරට. මම දැනට කලාව හරි මොකක් හරි එක්ක ඉන්නවා . .

• ඔය ලැබෙනවා කියන තෘප්තිය ගැන තෘප්තිමත් ද? ගත කරන ජීවිතේ ගැන, කරන වැඩ ගැන, ඔය ලබනවා කියන තෘප්තිය, ගත කරන ජීවිතේ, සමාජය, ගනුදෙනු කරන අනිත් පුද්ගලයො ගැන දකින්නෙ මොන විදිහටද?

ඒක මගේ අවශ්‍යතාව අනුව ඉතින් මම ම හදාගන්නවා. වැඩක් කරද්දි තෘප්තියක් ලැබුණට ටික කාලයක් ගියාම මට ඒක තෘප්තියක් නොවෙන්න පුළුවන්. සමහර වෙලාවට කරන වැඩ ගැන කල්පනා කරද්දි මගේම නිරුවත හෙලි වන වෙලාවල් තියෙනවා. හුඟ දෙනෙක් මේක ගැන සවිඥ්ඥාණික නැහැ. අපිට ඕන විදිහට හුඟක් දේවල් වල තේරුම් අපිම දාගන්නවා නෙ. ඒකෙන් හැමෝම තෘප්තියක් ම තමයි ලබන්නෙ. කරන වැඩ වලින් ඒ මොහොතෙ ජීවත් වීම තමයි ඉතින්.ඒක සාපේක්‍ෂයි මට. ඒක අදටත් ප්‍රශ්නයක්. හෙටත් එහෙම වෙයි මුකුත් පොටක් හම්බ නොවුනොත්.ලෝකය ගැන, සමාජය ගැන එක විදිහක තරහක් තියෙන්නෙ ඇත්තටම කිවුවොත්. මිනිස්සු කරන වැඩය,ි ඒවට ඉදිරිපත් කරන හේතුයි දැක්කම.ඒත් ඉතින් එක පාරට ආපහු මේකටම කඩාගෙන වැටෙනවනෙ. වගකීම්, ආශා, අවශ්‍යතා එහෙම මතු වෙන‍කොට. ඒ වෙලාවට ඉතින් තරහක් තමයි එන්නෙ.අනුන්ගෙ යහපතට කියලා කවුරු හරි දෙයක් කළත් ඒකෙනුත් මිනිහා යම්කිසි තෘප්තියක් නෙ ගන්නෙ… දැනට ජීවත් වන මොහොතෙ තෘප්තියත් එක්ක මම ජීවත් වෙනවා. ඊට වඩා දෙයක් තවම හොයාගන්න ලැබිලා නෑ.

• මේ සමාජය හරි ලෝකෙ හරි ඇතුලෙ(system එක ඇතුලෙ) තවත් එක් භූමිකාවක් රඟපාන එකද කරන්නෙ එතකොට.?

මේ යාන්ත්‍රණය ක්‍රියාත්මක වෙන විදිහ හොයන්න ගියොත් කෙලවරක් නැහැ කියලා තමයි හිතෙන්නෙ.එක එක පියවරවල් හොයාගත්තත් ඒකත් තව බලපෑමක් ඇතුව ක්‍රියාත්මක වෙනවා වගෙයි නෙ. මේ system එකට උත්තර හොයන්න යද්දි තවත් සිස්ටම් එකක් හම්බවෙනවා. ඒත් ඉතින් ඒකට විසඳුමක් දන්නෙත් නෑ. ඇත්තටම ඕක ගැන ප්‍රශ්නයක් තියෙනවා. ඔළුව පුපුරන්න තරම් ඔය ගැන කල්පනාකළත් ආයෙ මුලටම එනව වගේ. ඒ කල්පනා වලින් එළියට ආපුවහම ආයෙමත් ගනුදෙනු කරන්න වෙන්නෙ මේ සමාජෙත් ඒක්කම නෙ.

මේ ඔක්කොම කලින් සැලැස්මකට වෙනවා වගෙයි එක අතකට. තෘප්තිය උදෙසා අපි වහල් වෙනවා වගේ. ඒ තෘප්තිය තමයි ඇම අපේ ‍භූමිකාව රඟපානවට. ඒ උනත් ඒ සැලැස්ම හරි මොකක් හරි එකත් අර විදිහෙම තෘප්තියක් උදෙසා නෙවෙයි කියලා කොහොමද කියන්නෙ. ඕක කවුරු හරි හදපු එකක් කියමුකො. ඇත්තටම මම එහෙම කෙනෙක් ගැන නෙවෙයි කියන්නෙ. එහෙම හිතමුකො. ඒ කෙනාත් තෘප්තියට වඩා දෙයක් බලාපොරොත්තු උනා කියලා හිතන්න පුළුවන්ද? එයා අපිට සාපේක්‍ෂව උඩින් උනත් අර යාන්ත්‍රණේට අහුවෙලා ම නෙ වැඩ කරන්නෙ.

ඔහොම හිතාගෙන යනවා ඉතින් වෙලාවකට.ඒත් අර කිවුවා වගේ ආපහු එක පාරට මෙවුවා අස්සට ආයෙමත් කඩාගෙන පාත් වෙනකොට ඉතින්….ම්ම්හ්……. ඉස්සර ඉඳන් හැදිච්ච පසුබිම හින්දා සමහර දේවල් ඇඟටම පත්තියම් වෙලා ත් වගේ. ඒ රාමුවට එක අතකට හිර වෙලාදත් මන්දා. මේ සවිඥ්ඥාණික වීම පුදුමාකාර වධයක් ඇත්තටම කිවුවොත්. ඒක වරදක් ද නැද්ද කියන්න නම් දන්නෙ නැහැ.

• ඉස්සරහට මොකක්ද කරන්න හිතන් ඉන්නෙ? album එකක් එහෙම කරන්න අදහසක් තියෙනවද? සංගීතය හරි නාට්‍ය ගැන හරි නෙවෙයි, සමස්තයක් වශයෙන් ගත්තොත්?

අනේ නැහැ බං එහෙම කියලා විශේෂයක් කරන්නෙ නැහැ.. කලින් කිවුවා වගේ ඒක ඒ ඒ පසුබිම මත තීරණය වෙයි. ම‍ම හිතන්නෙ නෑ මට ඒක දැන් කියන්න පුළුවන් වෙයි කියලා. Album එකක් කරන්න නම් දැනට කොහෙත්ම අදහසක් නැහැ. අළුතෙන් විශේෂ යමක් කරොත් ඉතින් ඒක එදාට එලියට ඒවි. ඇත්තටම මට ඒ ගැන පෙරයීම් කරන්න බැහැ.

සාකච්ඡා කළේ:- රමේෂ්, කමල්, තිළිණ